«Фермер мәктәбе»н тәмамлаучы Татарстанда куертылган сөт җитештерүне башлап җибәрергә ниятли

Татарстан Республикасында Россельхозбанкның «Фермер мәктәбе»мәгариф проектының бишенче агымының иң яхшы проектын билгеләделәр. Бизнес-план Мамадыш районы территориясендә куертылган сөт җитештерүне күздә тота. Бүген проектның инициаторы, «Бал сөте» кооперативы рәисе Алмаз Якуповка грант ярдәме алуга сертификат тапшырдылар.

Яңа гына барлыкка килгән фермер үз бизнесын киңәйтергә һәм  куертылган сөт җитештерүне башлап җибәрергә планлаштыра. Планда – вакуум аппараты сатып алу. Җитештерү өчен чималны кооператив һәм башка шәхси ярдәмче хуҗалыклар әгъзаларыннан сатып алачаклар.

Бүләкләү тантанасында Татарстан Республикасы Авыл хуҗалыгы һәм азык-төлек министры урынбасары Рөстәм Гайнуллов, Россия авыл хуҗалыгы банкының Татарстан төбәк филиалы директоры урынбасары Регина Хөсәенова, Казан дәүләт аграр университетының икътисад институты директоры Марат Низаметдинов катнашты.

Рөстәм Гайнуллов үзенең сәламләү чыгышында билгеләп үткәнчә, банк, министрлык һәм югары уку йортын берләштерү үсәргә һәм агробизнесны актив дәвам итәргә теләгән фермерларны тулысынча яңадан укытырга мөмкинлек бирә.

Регина Хөсәенова билгеләп үткәнчә, Татарстан Республикасында «Фермер мәктәбе» 5 тапкыр уңышлы гамәлгә ашырылган. Проектны 179 тыңлаучы тәмамлаган, шуларның 35е – 2024 елда. Укыту фермерларга фермер хуҗалыклары эшенең хокукый аспектларын, финанс бизнес-модельләрен, Маркетинг нигезләрен, яңа агротехнологияләрне өйрәнергә һәм республиканың уңышлы агропредприятиеләрендә практик әзерлек узарга мөмкинлек бирде.

Грант алучы Алмаз Якупов сүзләренә караганда, программа яңа белемнәр алуга гына түгел, фермерлык эшчәнлегендә тәҗрибәләре кулланылырга мөмкин фикердәшләр белән хезмәттәшлекне җайга салуга да юнәлдерелгән.