20 августта Татарстан Республикасында Казан дәүләт аграр университетының Агробиотехнопаркы территориясендә уза торган «Рус кыры» Бөтенроссия форумы кысаларында «ЭкоНива» җаваплылыгы чикләнгән җәмгыяте һәм Казан дәүләт аграр университеты арасында фәнни — гамәли хезмәттәшлек һәм стратегик партнерлык турындагы килешүгә кул куелды
«ЭкоНива» ҖЧҖ исеменнән килешүгә селекция һәм беренчел орлыкчылык үзәге директоры Виталий Волощенко, ә югары уку йорты ягыннан Казан ДАУ ректоры вазыйфаларын башкаручы Илшат Нуриев кул куйды. Әлеге килешү кыр культуралары селекциясе, генетикасы һәм орлыкчылык өлкәләрендә квалификацияле кадрлар әзерләүгә, теория һәм практиканы берләштерә торган база кафедрасын булдыруны, шулай ук фәнни хезмәттәшлекне тирәнәйтүне дә кертеп, уртак уку һәм тикшеренү эшчәнлеген оештыруга юнәлдерелгән.
Виталий Волощенко сүзләренчә, әлеге килешү заманча агрономиянең мөһим бурычларын хәл итәргә сәләтле белгечләрне һөнәри әзерләү өчен яңа перспективалар ача: “Бу килешү бөтен тармак өчен зур әһәмияткә ия. Безнең белгечләр Казан дәүләт аграр университеты галимнәре белән берлектә селекция һәм генетиканың фундаменталь аспектларына кагылышлы юнәлешләрне үстерергә планлаштыралар. Ышанам ки, без бергәләп үзебезнең орлыкларның сыйфатын яхшыртуга һәм югары уңышка ирешүгә юнәлдерелгән сизелерлек нәтиҗәләргә ирешәчәкбез”
Илшат Нуриев, килешүгә кул куюны шәрехләп, болай дип ассызыклады: “Безнең өчен фән һәм производство көчләрен берләштерү мөһим, чөнки ул икътисад тармакларының нәтиҗәле үсешен тәэмин итә. Заманча компетенцияләргә ия югары класслы белгечләр формалаштыру өчен шартлар тудыру Россия авыл хуҗалыгын тотрыклы үстерүнең нигезе булачак. Безнең хезмәттәшлек Россия агросәнәгать комплексы өлкәсендәге стратегик бурычларны хәл итүгә зур өлеш кертер дип ышанабыз”.
Шулай итеп, төзелгән килешү аграр секторның торышын яхшырту, теория һәм практика бәйләнешен ныгыту өчен киң перспективалар ача һәм илдә селекцияне һәм орлыкчылыкны актив үстерү өчен уңай шартлар тудыра.