Казан ДАУ базасында республика агрономнар киңәшмәсе
25 декабрьдә агрономия факультетында ТР Премьер-министры урынбасары ТР Авыл хуҗалыгы һәм азык-төлек министры Марат Җәббаров, авыл хуҗалыгы идарәләре, агрохимия хезмәтләре, Дәүләт Сорткомиссияләре, инвесторлар һәм республика авыл хуҗалыгы җитештерүчеләре башлыклары һәм белгечләре катнашында республика агрономия киңәшмәсе узды.
Кунаклар агроэкологик тикшеренүләр үзәге лабораторияләре, махсуслаштырылган укыту-демонстрацион класслар һәм агрономия факультеты тарихы музее белән таныштылар.
Марат Җәббаров институтларның авыл хуҗалыгы тармагы өчен мөһимлегенә һәм чыгарылыш сыйныф укучылары өчен гамәли күнекмәләрнең әһәмиятенә басым ясады. ТРАвыл хуҗалыгы һәм азык-төлек министрлыгы башлыгы чыгарылыш курс студентларын тармакта кулланыла торган, әйтик, АгроСемЭксперт кебек махсус программалар белән таныштырырга тәкъдим итте.
Исегезгә төшерәбез, Татарстанда «АгроСемЭксперт» программасы эшләнгән, ул аграрийларга сатып алу өчен орлыкларның кулай партиясен табарга яки аларны китерү буенча үз тәкъдимнәрен урнаштырырга ярдәм итә. Программа шулай ук хуҗалыкларга җентекле анализ үткәрергә, орлыкларның сыйфатын һәм санын күзәтергә мөмкинлек бирә. Системада селекция казанышлары дәүләт реестрына кертелгән үсемлекләрнең куллануга рөхсәт ителгән сортларын тиз эзләү бар. Аграрийлар программадан тулысынча бушлай файдалана алалар.
2019 елда игенчелек тармагы йомгаклары буенча доклад белән ТР Авыл хуҗалыгы һәм азык-төлек министры урынбасары Илдус Габдрахманов чыгыш ясады.
Орлыкчылык мәсьәләләре буенча шулай ук Россия Авыл хуҗалыгы үзәгенең ТР филиалы җитәкчесе урынбасары Рафис Хәбибуллин чыгыш ясады. Ул республика аграрчылары өчен Россельхозүзәк сайтында сертификацияләнгән орлыклар реестры урнаштырылган, ә 2020 елның гыйнварыннан АгроСемЭксперт программасында грунт контроле орлыкларын узу турында мәгълүмат та пәйда булачак, дип белдерде.
Госсорткомиссия ФДБУ филиалы начальнигы Виталий Новичков сорт сынаулары турында сөйләгәндә, хәзерге вакытта учреждение тарафыннан 30 культура, 1000нән артык сорт һәм гибрид буенча сынау үткәрелә, дип билгеләп үтте. “Идеаль сортны булдыру мөмкин түгел. Һәр кырга үзенекен сайларга кирәк. Даими һәм тотрыклы уңыш алу өчен без төрле сортлардан һәм культуралардан файдаланырга киңәш итәбез”, – дип аңлатты Виталий Новичков.